Ég er staddur mitt í því ferli að færa tölvupóst úr Microsoft Exchange umhverfi yfir í annað umhverfi. Þar sem ég hef hugsað þetta lengi og uppgötvað ýmislegt á leiðinni þá ákvað ég að setja niður nokkra punkta ef það verður einhverjum öðrum til hjálpar.
Ástæður flutnings
- Sparnaður - yfirleitt er dýrara að vera með Microsoft Exchange tölvupóst hýsingu heldur en flest annað. Exchange er hannaður til að höndla GRÍÐARLEGT magn af pósti - mun meira en flest ef ekki öll fyrirtæki á Íslandi þurfa á að halda. Pósthýsing sem nýtir opinn hugbúnað er yfirleitt alltaf ódýrari.
- Geta stjórnað öllu sjálfur - það er kostnaðarsamt að þurfa að fá tæknimann til að gera hvert smáviðvik eins og bæta við pósthólfi o.s.frv. Í þessu tilfelli sem ég er að vísa til er farið yfir í CPanel umhverfi þar sem hægt er að stjórna öllu sjálfur - þarf ekki mikla sérþekkingu til.
Nýtt umhverfi
Nýja umhverfið er linux póstþjónn sem styður POP3, Imap ofl. Outlook er skipt út, í staðinn er notað Webmail Pro frá Afterlogic Þetta viðmót er einfaldlega PHP vefviðmót sem sækir póstinn á póstþjóninn og mokar honum ofan í MySQL gagnagrunn. Kostir:
- Póstur er geymdur miðlægt með öruggum hætti.
- Hraðvirkt og öflugt vefviðmót fyrir notendur, aldrei vandamál að nálgast póstinn lengur - og þarf ekki Outlook til. Kemur með tengiliðum og dagbók - hægt að deila dagbók með öðrum notendum að vild.
- Frumkóðinn að Webmail Pro kemur með - hægt að breyta því sem þarf að vild.
- Innskráning notenda einföld - einfaldlega sama netfang/lykilorð og pósthólfið sjálft er með á póstþjóninum.
Ferli flutnings
- Byrjaði á því að prófa allt og sjá hvort það virkaði. Setti upp Webmail pro og sannreyndi að allt virkaði.
- Skráði lén fyrirtækisins (t.d. www.lenidmitt.is og netfang@lenidmitt.is) inn hjá “nýja” hýsingaraðilanum.
- Lét breyta mx færslu hjá “gamla” hýsingaraðilanum þannig að allur nýr póstur kæmi eftirleiðis til nýja hýsingaraðilans.
- Sannreyndi að allt virkaði.
- Fór inn í Outlook hjá hverjum notanda fyrir sig og vistaði allan póst sem .pst skrá (File->Export). Setti lykilorð á þessar skrár og vistaði þær á öruggan stað.
- Til að flytja gamlan póst hvers notanda:
- - Opna .pst skrá hans í Outlook hjá mér.
- - Taka allan póst sem er stærri en 1mb og draga hann yfir í möppu (ekki outlook möppu heldur skjalamöppu windows explorer) - og segja notanda að fara í gegnum þennan póst - henda því sem á að henda, vista í skjalasafni það sem á heima þar - skilja eftir það sem virkilega á að flytja. Það tekur allt of langan tíma að flytja svona stóran póst.
- - Skrá nýjan póst account inn í Outlook og tengja það með IMAP á pósthólf viðkomandi notanda á nýja póstþjóninum.
- - Fara inn í nýja viðmótið - skrá möppur sem endurspegla þær möppur í Outlook sem notandi er með.
- - Fyrir hverja möppu í Outlook - skrá filter í nýja viðmótinu sem flytur póst inn í samsvarandi möppu í nýja viðmótinu um leið og hann skilar sér í Inboxið. Hægri smella svo á póst sem á að flytja og velja “Move to folder” í Outlook - velja IMAP möppun. Þar með sér Outlook um það að moka póstinum inn á nýja póstþjóninn. Filterinn á nýja viðmótinu sér um að moka póstinum í rétta möppu. Fyrir næstu möppu í Outlook þarf svo að uppfæra filterinn þannig að hann bendi á nýja möppu - og svo velja aftur “Move to folder”
Það er hægt að eiga .pst skrárnar áfram - ef eitthvað kemur upp síðar og það þyrfti að grípa til þeirra (ágætt að þjappa þeim - zip ).
Vona að þetta verði einhverjum til hjálpar - ég er a.m.k. ánægður með hvernig til tókst!
